Inhoudsopgave
Aoventouw es me de gèzet opesleit daan zuut me hei en dao de vraog opkoume: wie moot ’t weier? Dat is op mierdere zakes vaan touwpassing. In Mestreech zien veer de lèste jaore verweend gewoorde door belaankrieke dinger in eus stad te mage mètmake en beleve. Al ‘nen hielen tied vreug me ziech aof of de Tefaf nog wel in Mestreech zal blieve of geit keze veur ’n aander plaots die groeter en belaankrieker is es dat pläötske dat urges in ’t zuije vaan Nederland ligk. Tefaf is d’r evels nog ummer en mèt succes. De klein vleegmachiensjes zalle eus vleegveld weer aondoen en mèt e laank of kort bezeuk al dat sjoens koume bewundere. De hotels, de B&B’s en de logeminte vare dao wel bij.
Wie zit ’t mèt de internationaal studente in eus stad. Mage ze noe wel koume of mage ze neet? Slum vaan Rianne Letschert um toch reklaam te make bij eus naobers en studente hei naor touw te hole. Veer zien die boetelandse studente noe einmaol geweend. Ze zien oonderdeil vaan Mestreech gewoorde. Neve eus eige Mestreechter taol huurt me hiel väöl Ingels praote. Dat gief toch aon tot Mestreech mèttelt in Europa. Es ’t aontal studente zouw mindere zouwe veer dat zeker goon veule en welliech tot daan dinger, die veer noe gewoen vinde, weer zouwe verdwijne. Hopelek zuut Den Haag in tot Mestreech ’t nudeg heet. Trök is achteroet, veuroet is beter.
Daan steit aoventouw de gezèt vol euver de concerte vaan André Rieu. Mestreech leef es die concerte d’r zien. Ederein vaan euver de ganse wereld wèt Mestreech te vinde. Es André vraog boe de lui vaandan koume daan steit me ummertouw verstèlt vaan ’t feit tot lui ’n wereldreis deveur euver höbbe um nao eus Mestreech te koume um ziech hei muzikaol te laote verwene.
Me kint ziech noe aofvraoge: wie moot dat weier es …? Verdwijne die zakes op d’n doer of geit ’t gewoen weier? Wat kump daoveur in de plaots?
Geine heet ‘ne glaze bol um in te kieke! De touwkoms zal ’t us liere. Noe kinne veer in edergeval devaan genete. Daot dat daan ouch mer!
Jan Janssen
