Inhoudsopgave
In dizzen tied vaan ’t jaor heet me ’t dekser euver ’t getal 11. Wat is noe zoe bezunder aon dat getal?
Dao zien ’n aontal reies veur en mierdere meugelekhede veur oetlègk. Op de ierste plaots huurt me hiel deks tot ’t getal 11 ’n oonumkierbaar getal is. 11 blijf 11 en 22 blijf 22. Aander getalle kint me umdrejje boe ze ‘nen aanderen inhaajd kriege. Veurbeeld: 12 weurt 21 en 81 weurt 18.
Vaanoet de religie kiek me weer aanders nao ’t getal 11. Mozes heet indertied vaan God de Vaajer de 10 gebooje gekrege. De tien artiekele vaan de 10 gebooje vertèlle de minsheid boe me ziech aon te hawwe heet um later, es me doed is, d’n hiemel mèt te kinne verdene. Wee ziech dao aon hèlt is ‘ne fatsojndeleke mins dee good mèt aander lui kint umgoon. ’t Getal 11 steit neve die 10 gebooje. ’t Getal 11 gelt veur iemes dee gein maot wèt te hawwe (in ’t Nederlands: Mateloosheid) en leve in zun. ’t Is e duvelsgetal zag me vreuger. In de middeliewe woort ’t getal 11 gebruuk um lui te duie die boete de wèt en gebrukeleke leefregels leefde, zègk mer ’t krapuul oet deen tied die leefde en handelde zoonder God of gebod.
Aon ’t getal 11, dat oonumkierbaar is, gief me ouch de beteikenis tot alle lui geliek zien. Oonder de narrekap is ederein geliek. 1 is geliek aon de aander 1. Dat is ouch ’t weze vaan vastelaovend. Alle range en stande valle weg en mèt vastelaovend is ederein geliek, veer make gein oondersjeid. Ederein maag mètdoen. Dat zien eigelek ouch de trefwäörd vaan de Franse Revolutie. Egalité, Liberté et Fraternité, de ierste lètters vörme ’t woord ELF. Geliekheid vaan alle lui waors toen ouch ’t motief en dat heet destijds d’n adel, in völ gevalle, de kop gekós.
D’n 11e vaan d’n 11e is ’n belaankrieke daag. Daan begint veur de carnavalvierder ’t sezoen meh deen daotem is neet zoemer gekoze. Vaanaof d’n 11e vaan d’n 11e is ’t percijs 40 daog tot d’n aonvaangk vaan de winter, vaanof de Keersemes is ‘t 40 daog tot aon Maria Lichmis (2 fibberwarie) dat is teves de vreugsten daag tot carnavalsdinsdag kint valle. En teves de vreugsten daag es veuraovend vaan de vastentied. Weer 40 daog later is ’t Paose en weer 40 daog later Hiemelvaart. Meh de stand vaan de maon, ’t ierste keteer, bepaolt wienie dat zjus is.
De Prins heet ziene Raod vaan Elf. ’n Raod dee verwijs nao de geliekheid vaan ederein dee mètdeit in ’t vastelaovendgebäöre. Edere mins heet eve väöl rechte (en pliechte) es d’n aandere. Niemes hoof oonder te doen veur d’n aandere.
De vastenaovend is door alle die misterieuse zakes en tradidties e sjitterend fies dat vreuger jaore ouch um 11 oor 11 op zoondagmörge begós meh umtot daan nog mèsse woorte gehawwe in de Sint Servaos en me die mèsse neet wouw versteure is me nao 12 oor gegaange. Daan sjete de Tempeleers 11 kier mèt ’t Momuskenon.
Jan Janssen
Van onze partner
