Inhoudsopgave
De gemeinte Mestreech heet ’t sjoen veurnumme um Mestreech in 2050 vaan ’t gaas aof te hole. Dat vermindert de CO2 oetstoet en dat is ’n gooj zaak. Minder rotzooi in de loch en dat is veur ederen inwoener vaan eus stad en de naoventrint beter veur de gezoondheid. Gezamelek weure veer dao beter vaan!
Sins de kolekachel ’t hoes oet is stoke de mieste lui op gaas en weurt ouch op gaas ’t ete klaor gemaak. Dat zien veer oonder de hand gewoen geweend. Me vreug ziech daan ouch aof wie ’t moot es astrein gein gaas mie is veur alle die zake. Dat kump deils door dee misseleke menier Poetin dee zoe nudeg oorlog moos make, meh zelf zaote veer ouch te koekeloere mèt eus gaasbel in Groningen. Dao zakde de lui vaan Groningen de groond oonder de veuj weg en heet me de boel op sloot gezat. Me moot daodoor vlotter nao aander meugelekhede loere.
Sins e tiedsje zien veer noe aon ’t prakkezere euver “Warmte Transitie”. Wie kinne veer in Mestreech de hoeshawwes werm hawwe op aander menere es tot gebrukelek is. Veur e deil gebäört dat al in Mestreech door de hits vaan de groet industrie, lees Sappi, te gebruke. Es Sappi pepier maak heet me door väöl wermte bij nudeg. En die hits zouw me aanders gewoen de loch in bloze. Noe vingk me die hits op en kint me dao e gedeilte vaan Mestreech mèt verwerme. In eus stadsdeil Céramique heet me ouch e wermtenet aongelag meh dao gebruuk me nog ummer väöl gaas um wermte op te wèkke.
Me is noe aon ’t zeuke nao aander meugelekhede. Veer kinne beveurbeeld wermte hole oet ’t rioolaofvalwater in de zuveringsinstallatie. Ouch wermte oet ’t Maoswater behuurt tot de meugelekhede. Vraog miech neet wie dat kin meh dao höbbe veer eus gelierde veur die dat veur Mestreech woer kinne make. Daodoor höbbe veer astrein gein gaas mie nudeg. Gaas dat oondertösse hiel erg deur is gewoorde en boe veer e tiedsje geleie behuurlek vaan zien gesjrokke. ’n Aander wijs vaan verwerme en ’n goodkoper wijs is dus zier welkom.
De koumende jaore goon veer dus mètmake tot wiek veur wiek Mestreech langsem vaan ’t gaas aofgeit en veer eus hoezer op ’n aander meneer goon verwerme.
Netuurlek zien d’r ouch nog aander menere wie waterstof en dat soort zake meh dat ligk veur e groet gedeilte nog in de touwkoms.
Jan Janssen
Van onze redactie
