Inhoudsopgave
Wat höbbe veer de aofgeloupe daog toch gebóf mèt ’t weer. Ederein voolt ziech verras door ’t zönneke dat teveursjijn kaom en zörgde veur ’n heerleke temperatuur. Väöl lui wiste indirek de terreskes te vinde en te genete vaan ete in de boeteloch.
Veer waore neergestreke op e terras op ‘t Wapenplein vaan Oostende. Twie Frans sprekende dames aon ‘t täöfelke neve us hadde ziech verheug op ’n poorsie mossele. Ze waore drök aon ’t praote wie de serveerster mèt twie groete panne mossele kaom aonzètte. De dames vele stèl en begóste nao ein te gniffele. Ze kraoge wat ze gehoop hadde te kriege. ’t Rouk heerlek en veer hoorte de dames haos neet mie. Ne parle pas mais profite des moules.
Veer kraoge de bestelde garnalekrokètte en euzen aondach ging ouch nao euze teleur en wat dao op laog te straole. De smaakpupille woorte wakker gemaak en in ’t zönneke maakde alles väöl lekkerder es verwach.
Eve later kóste veer zien tot de boulevard langsem vol begós te loupe mèt wat veer neume “dagjesmensen”. De kraome boe ieskes, waffele en petatte te koup waore, kaome han te kort. De winkelkes mèt sjöpkes en ummerkes hadde nog eve niks te doen, de lui waore te verras door de zon en de kinder zaote nog op sjaol.
Opvallend in Belsj zien toch de kuitskes boe de hun in verveurt weure en boe gemeinelek ‘ne maan achter löp. Iech moot ummertouw lache es iech dat zeen. Hun höbbe twie bein mie es eine vaan us dus laot ze loupe, meh die meining zal wel te kort door de boch zien.
Dat alles kin iech uuch vertèlle umtot de zon häör werk deeg wijl veer ’t neet verwach hadde. Op ’t strand laog nog niemes te zonne. Allein zaog iech twie manslui mèt ‘nen metaoldetector op ’t strand. Vaan links nao rechs ginge die dinger op dat zand, dat door graofmachienes weer glad gestreke waors en laog te wachte op de koumende zomer, in d’n hoop get vaan weerde te vinde.
Iech moos eve aon Toon Hermans dinke en zien sjitterend leedsje: “een ballon, een ballon, een ballonnetje. Een ballontje dat danst in de wind aan een draadje naar de zon!” En eve dach iech nog neet aon ’t weer vaan de koumende week.
Jan Janssen
