Inhoudsopgave
Wie veer pas geleie in Gemmenich waore veel mien oug op ‘ne blómmewinkel. In Mestreech zouw dat winkelke volledeg misstoon meh in de Waolepays pas dat perfect. Opvallend waor tot boete aon de straot allemaol pötsjes stoonte mèt e tekske mistletoe, get klie (klavertjevier) en e pupke vaan ‘ne sjouweveger. E kedooke veur de Nuijaor en ’n traditie die veer eigelek bij us neet kinne.
In Duitsland, Zwitserland en Oostenriek sjink me ziech dat oonderein um de oontvenger vaan dit kedooke e good jaor te winse. Me wins d’n aandere ‘ne nuie start, gelök en e good jaor.
De sjouweveger is ’t symbool vaan gelök en goojigheid. De sjouweveger zörg naomelek veur e veileg geveul umtot de sjouw geveeg is en ’t brandgevaar daodoor uters beperk weurt. De sjouw waors vreuger jaore, väöl mie es allewijl, naomelek essentieel veur de wermte in hoes meh ouch tot fetsojndelek en veileg gekook kós weurde. In de mieste hoezer woort vreuger op de kwissenjair gekook. Twie dinger die in e minseleve hiel veurnaom zien en dus good en veileg mote gebäöre.
In ’t pötteke zit ouch get klie (klavertjevier). Dizze klie steit symbool veur gelök. Klavertjevier is zeldzaam in de natuur. Lui goon op zeuk nao dizze klie in d’n hoop tot hun dat gelök bringk. Dus es me dat kedo krijg op nuijaorsdaag is dat hiel bezunder. De bleedsjes vaan dizze klie höbbe eder ’n bezunder beteikenis naomelek: bleedsje 1: steit veur hoop, bleedsje 2: steit veur gelouf, bleedsje 3: steit veur leefde en bleedsje 4: steit veur gelök. Door dee klie kedo te doen wins me iemes veer hiel bezunder dinger touw. E sjoen symbool!
Daan zit nog in ’t pötteke get mistletoe. Mistletoe is ’n hiel bezunder plant die hoeg in de buim greujt en daodoor meujelek te oogste is. Mistletoe is ’t symbool vaan leefde en vröchbaarheid. In Noorse legendes steit besjreve tot es twie vijande ziech oonder de mistletoe troffe tot daan ‘ne waopestèlstand woort aofgekondig. Mistletoe gief besjerrming en gelök.
Veer höbbe mer gaw e pötteke gekoch en mètgenome nao Mestreech. Niemes wèlt jummers die belaankrieke zakes in ’t leve misse. Trouwens, veer winse uuch allemaol de sjouweveger, de klie en de mistletoe touw veur 2025.
Jan Janssen
