Inhoudsopgave
De kleuren roed, geel, greun hure bij de vastelaovend. Veer zinge dao zelfs euver. Evels wie de Momus sociëteit bestoont waore de kleure aanders, naomelek roed, wit, greun. Pas bij de opriechting vaan de Tempeleers in 1945 zien de kleure gewijzig.
De kleure roed, geel, greun zien de kleure vaan ’t ierste oor. Alleriers bestoont de kleur roed. Die kóste de lui vreuger make umtot oxidatie vaan iezererts daoveur zörgde. Rotsteikeninge zien trök gevonde die in ‘ne roejen tint gemaak zien gewoorde. Greun kaom later meh waors lesteger um te make en geel, of beter gezag oker, waors ouch ’n kleur die lesteger te make veel. Pas hiel väöl later lökde ’t um blauw te fabricere.
Veer kinne dus rösteg stèlle tot roed, geel en greun de basiskleure zien en al vreuger jaore gebruuk woorte um teikeninge en sjèlderije te make. Die kleure passe ouch bijein. ’t Is e plezereg gehiel.
Kleure höbbe ouch ’n beteikenis en weure neet zoemer gebruuk en bijein gezat. De kleur roed steit veur leefde, mood en enerzjie. De kleur geel steit veur zon, leech en plezeer en de kleur greun steit veur hoop, nui leve en greuj. Die kleure höbbe dus allemaol get te make mèt d’n tied vaan ’t jaor, naomelek ’t begin vaan de lente. Nui leve in de wei, oetloupe vaan de buim en struuk en vaan de zon, nao d’n duustere winter, kriege de lui nuien enerzjie want de daog beginne weer te lenge.
In de heraldiek stoon de kleure geel en wit veur twie edel metaole. Geel steit veur goud (goud heet de beteikenis vaan edelmoedigheid en ‘ne verheve geis) en wit steit veur zèlver (zèlver heet de beteikenis vaan vrei en oprechheid). Allemaol zakes die ‘ne mins nao ’n hoeger plan bringe. In de heraldiek is ’t zoe tot twie kleure noets direk nevenein mage stoon meh ummertouw gesjeie mote zien door ’n edel metaol, dus goud of zèlver. Dat klop dus ouch veur de carnavalsvlag: roed, geel (goud) en greun.
De kleure die veer us umhaange mèt vastelaovend höbbe dus ’n deper beteikenis. ’n Beteikenis boe veer us neet vaan bewus zien meh oets welliech door de ierste gebrukers en bedinkers daoveur gekoze zien. Alles heet ‘nen achtergrond, de moos ’t allein mer te wete koume en vaandao dit stökste vaan dees week.
Jan Janssen
