Inhoudsopgave
Gisteraovend kaom iech roond tien oor vaanoet Mestreech trökgeloupe nao Wyck. Frappant is daan wieväöl lui op straot loupe te mojle tege iemes dee neet te zien is meh in d’n iphone aonwezeg is. Op de Kesselskade leep ’n jonge dame die sjijns wäörd had de persoen aon d’n aandere kant vaan de lijn. Koed en mèt korte wäörd waors ze aon ’t praote. Gein plezereg gesprek. Dat waors ouch aon häör geziech te zien dat strak waors, gespanne.
Op de Aw Maosbrögk stoont e meidske mèt ’n Aziatisch geziech. Roond häör stoonte get tasse en e groet koffer. In häör hand had ze d’n iphone en waors sjijns iemes aon d’n aandere kant vaan d’n eerdbol aon ’t laote zien boe ze waors. ’t Waors vreiselek mistig dus of d’n aandere get vaan de Wycker kant vaan eus stad kós zien weet iech neet meh ’t meidske doog häör bès um reklaam te make veur eus sjoen stad. Ze waors drök aon ’t vertèlle in ’n taol die iech neet kós verstaon meh ’t klónk enthousias en dao geit ’t um.
In Wyck bij d’n Ierse kaffee stoont e gans gezèlsjap boete in de kaw. ’t Gros waors aon ’t rouke en stoont in e hummeke of e bluuske aon de sigarèt te trekke. Evels haos allemaol mèt d’n iphone in de hand en dus in gesprek mèt iemes dee neet in de naoventrint waors. Daan dink me toch: “Lui geer staot lekker bijein. Mojlt mèt de lui die neve diech stoon dat is toch e stök gezèlleger es mèt iemes dee’ste neet kins zien en dee neet kin beleve wat’ste op dat memint mèt ’n pint in d’n aander hand aon ’t beleve bis.
Bij kaffee Zondag zaot de tent vol en ederein waors mèt ederein aon ’t mojle. Geinen tèllefoon te zien. Dat deit ‘ne mins daan weer plezeer. Zoe löp me daan riechting de stasie, loert nog eve nao binne bij hotel Beaumont boe de lèste gaste nog aon taofel zitte nao te mojle, en zuut me wie edere mins toch contak wèlt höbbe mèt iemes aanders. ’ne Mins heet iemes aanders nudeg en is neet gebore um allein door de wereld te stappe. De ierste regel vaan ’t sjoen gediechske vaan Toon Hermans zag ’t al: “Je hebt iemand nodig, stil en oprecht!”
Jan Janssen
