Inhoudsopgave
Höb geer ouch eur tuut vol vaan dat alles wat ederen daag op d’n tèllevisie besproke weurt? Ederen aovend praotprogramma’s. ’t Eint is nog neet aofgeloupe of ’t aander begint. En ’t ergste is ouch nog tot aon eder taofel dezelfde geziechter te zien zien.
Este dat einmaol bereik höbs daan biste binne of de moos op gegeve memint hiel gekke dinger goon vertèlle. Dus gewoen mètmoule is ’t bèste watste aon zoe’n taofel kins doen en daan biste beter aof es mèt e good pensioen. Zörg dus tot’ste aon taofel kins koume bij Eva, Beau, Sven, Tijs, Umberto, Renze, Sophie, Welmoed, Jort, etc. etc.
Dao is noe ouch nog Lubach bij gekoume boe ’t lache vaan de lui op de band steit want eigelek vint dee kerel allein z’n eige leuk. Veer aovende terror en zeuke nao aander programma’s.
De höbs haos geine zin mie um d’n tèllevisie aon te zètte. Este debij bedinks tot de mieste die aon zoe’ne gesprekstaofel zitte dao ouch nog veur betaold kriege daan kumpste daovaan haos aon ’t speie. Mèt e serieus geziech en get kwajts, wat ze oet hunne nek houwe, zitte die hun tès te veule en hope ze tot veer deen oonzin ouch nog geluive.
Goonsdagaovend ging ’t netuurlek euver de keuninkleke lintsjes en dat mins vaan Faber. In alle programma’s en op alle zenders ging ’t dao euver. Zelfs lui die allein verstand sjijne te höbbe vaan en euver songfestivalleedsjes woort gevraog wat ze dao euver dachte. Gelökkeg woort daonao neet aon de politiekers gevraog wat ze vaan ’t songfestivalleedsje voonte. Dat had gemekelek gekint! In Mestreech hèt zoeget sjele zeiver en dao zit daan gans Nederland nao te loere mèt e gleeske vaan ’t ein en aander in d’n aonslaag en netuurlek ’n zak chips binne handbereik.
Mote veer eigelek neet trök nao d’n tied wie allein saoves oetzendinge waore. Euver daag gaof ’t allein ’t tèsbeeld en saoves woort d’n tèllevisie aongezat um te loere wat ’t gaof. Thoes kaom haos altied d’n Duitser op te stoon. Dee had leuke programma’s en d’n Duits woort ouch nog väöl beter dao door. D’n Hollender had destijds ouch hiel väöl prao’programma’s en dao hadde toen de lui ouch neet väöl zin in. “Die wete ’t altied beter es eine vaan us”, hoort me de lui gemeinelek zègke.
Soms vinde veer Flikken Maastricht nog wel get um nao te loere. Mestreech blijf toch Mestreech ouch al knuipe die vaan Flikken de straote raar aon ein. Opins rijdt de pelisiewagel euver de Kennedybrögk um rechs aof te sloon en um daan inins op Potteberg oet te koume en ’n hoes op d’n Haosedans binne te goon. Eve mooste daan sjakele um te dinke “boe zien ze noe weer?” Meh dat is beter es alle deen oonzin aon te hure zoe vlak veur ’t slaopegoon.
Jan Janssen
