Inhoudsopgave
Mestreech is langsem aon ’t verandere vaan industriestad nao kinnisstad. Wie veer evels nog industriestad waore en de industrie nog in Mestreechter han waors kós hiel väöl gedoon weure veur Mestreech en de bewoeners op de febrikke. Dat kaom zier zeker mèt de vastelaovend vaan pas. Op ’t pepierfebrik, toen nog KNP, wèrkde ’n aontal prominente Mestreechtenere die get in de mèlk te brokkele hadde es get te viere waors in de stad. Zeker op de wèrkplaots boe mèt metaol en hout gewèrk woort, waors weke vaan teveure ouch bedrijvegheid veur de vastelaovend. De meister vaan de wèrkplaots loerde d’n aandere kant op of zaog ’t neet good en tössedoor woort vaan alles ineingesjrouf wat in d’n optoch gebruuk kós weure.
’t Tempeleersmaggezijn laog in die jaore nog in de Kepoenstraot. In ’t maggezijn woorte op houte vloere de vastelaovespoppe vasgesjrouf en op vriedag veur de vastelaovend kaome de vrachwagele vaan KNP, Enci en Sphinx nao ’t maggezijn. De Kepoenstraot waors daan volledeg geblokkeerd. De kós d’n koont neet mie drejje in de straot meh al gebäörde veur de vastelaovend vaan Mestreech. De vloere woort mèt ‘nen heftruck op de platte wagele geluf um ze veerdeg te make veur de groeten optoch op zoondag. Es de wagele klaor waore daan voorte ze nao ’t bedrief boe ze thoes huurde en wachde dao tot zoondagmörge es in Wyck d’n optoch opgestèld mós weure.
Alle lui dege dat pro deo en op zoondagmörge ging de stadsprins langs alle wagele die d’n optoch inginge um de sjeffäörs ’n medaaje op te spange oet daank veur hunnen inzat.
Nao d’n optoch waors opnui bedrijvegheid in de Kepoenstraot umtot de vloere daan weer vaan de wagele aofgehaold móste weure. Dat waors hel wèrke meh me wis boe me ’t veur deeg.
De groete bedrieve in de stad waore gruuts op ’t feit tot ze aon dat volksfies kóste deilnumme door hun materiaol besjikbaar te stèlle en hun lui de meugelekheid te geve um dinger te doen of te laote make veur de vastelaovend. Noe geit dat neet mie umtot de bedrieve neet mie bestoon of umtot de directie neet mie in Mestreech zit en neet wèt wat veer hei in Mestreech aon ’t oetspoke zien.
Vastelaovend is aanders gewore meh daorum neet minder gezèlleg. Tije verandere noe einmaol meh ’t is leuk um avventouw eve trök te dinke.
Jan Janssen
