Inhoudsopgave
Al vaan keends aof aon, wie iech op de liegere sjaol veur d’n ierste kier ’t ganse verhaol hoort, had iech ’t idee tot eine vaan de Drei Keuninge oet de naoventrint mós koume. Iech woende destijds al in Wiekerveld. Es jong weurt me door zoe verhaol op sjaol nuisjiereg.
Wie iech daan ouch de kans kraog ging iech in d’n hoof bij us thoes zeuke boe ’t ooste waor. Oet ‘t ooste kaom zeker eine vaan de keuninge had de meister vertèlt en dee meister waor de zoon vaan de köster vaan de Lourdeskèrk in ’t Wittevrouweveld dus dee mós ’t wete. Mien verkenners compas gaof nao väöl drejje en zoe aon tot ’t ooste aon de linkerkant vaan euzen hoof mós ligke. Dat waor de Noormannensingel. Volges miech kós dao geine keuning vaandan koume want iech kós alle lui die dao woende en dao waors geine mèt ‘nen oetzunderleken naom bij. Ze hèdde gewoen Pieters, Habets, bekker Kicken en zoe.
Aon d’n euverkant vaan de straot waors ’t weike boe later ’t gebouw vaan KPN mós koume te stoon. Dao woende dus niemes en zeker gein femilie vaan ‘ne keuning. Dee keuning mós dus, volges mien berekening, oet ’t Wittevrouweveld koume.
Alle aonwijzinge ginge ouch in die riechting. Mèt de vastelaovend koch iech knakkers veur mien geweer in de van Oppenstraot bij maggezijn “De Keemel” vaan Gerard. Es dat gein aonwijzing waor! Boete dees aonwijzing waors dao nog ’n twiede aonwijzing naomelek “de Keemeleers”, destijds oet ’t Wittevrouweveld. Zoe bies hadde allein de drei keuninge dus iech mós weier zeuke in ’t Wittevrouweveld.
De drei keuninge waore indertied achter ’n staar aon gegaange. Daorum hèdde netuurlek de voetbalclub die in 2005 woort opgeheve destijds “White Star”. Weer ’n aonwijzing! Allein de vraog: boe woende destijds dee keuning?
Aon de Koning Clovisstraot ligk B&B de Ingel. Dat is ouch neet veur niks este miech vraogs. En veurwat hèt de jäögcarnavalsvereiniging ‘de witte ingelkes’. Allemaol aonwijzinge tot eine vaan de drei keuninge oet ’t Wittevrouweveld moot zien gekoume.
In Kölle bewaore ze de sjrein vaan de heilege drei keuninge. De Gele Rijders, en zeker hunne veurzitter John Heuts, goon dèkser nao Kölle. Dat is ouch ’n aonwijzing! Welliech tot die ouch aon ’t zeuke zien?
Allein blijf de vraog boe oets eine vaan de drei keuninge in ’t Wittevrouweveld gewoend heet. Of zouw dat, dat vèlt miech noe op ’t memint in, urges aon ’t Keuningsplein gewees mote zien?
Jeh, iech wèl ’t euze pestoer Mattie neet vraoge want dee heet ’t noe hiel erg drök mèt de Keersemes, meh welliech tot dee get mie wèt. Blijf ’t gegeve tot eine vaan de drei keuninge oet ’t ooste kaom, dus Wittevrouweveld. Dat spoor haw iech vas!
Mesjien tot astrein eine in ’t Wittevrouweveld de boen in de keuningskook vint en ziech daodoor verraojd! God wèt ‘t!!
Jan Janssen
Van onze redactie
