Inhoudsopgave
Op zoondagmörge höbbe veer ‘ns euver de Merret geloupe boe de kräömkes mèt allerhande kiksjozerije stoon. De mieste verköpers zitte op hun gemaak achter ’t kräömke en loere ‘ns eve op es iemes get langer bij hunnen handel blijf stoon. Ze wete persijs de prijze want zoe gaw es me get vaspak um ’t get beter te beloere, rope ze indirek de pries. Veur de potentiële köper is internet groet vergif. De verköper heet netuurlek alles via internet opgezoch en wèt persijs wat ’t is en heet daodoor ouch ’n priesindicatie. Handele is haos neet mie debij.
E meidske stoont ziech ’n kèttel te beloere bij ein vaan de kraome. Ze voont de kèttel sjoen en beloerde ze vaan alle kante. In gedachte, dat zaog me, had ze al de bluuskes op ’t oug boe de kèttel bij zouw passe. De pries waors evels nog neet geneump. De medam achter de kraom had sjijns ouch op internet zitte zeuke en wis persijs te vertèlle wat die kèttel moos koste. ’t Meidske voont de kèttel sjijns toen neet mie aontrekkelek en um nog get mie zaajt in de won te sjödde wis de medam vaan de kraom te vertèlle tot diezelfde kèttel zesteg euro deurder zouw zien es aon de kèttel ’t zjuste, orginele sleutsje had gezete. De kèttel woort trök gehaange.
Get weier laog e sjèlderijke vaan oet Kevelaar. Vief euro vroog me deveur. Datzelfde sjèlderijke hingk bij miech thoes. Dat stamp oet d’n tied tot iech nog in breuk leep mèt korte piepe en op de liegere sjaol zaot. De parochiaone vaan pestoer Nijsten vaan Wiekerveld ginge destijds op bedevaart nao Kevelaar en iech moch mèt. Mien sjèlderijke is dus gaw zoe’n zeventeg jaor aajd. ’n Jäögherinnering. De foto mèt menier pestoer höb iech nog.
Opins reep mie meidske op miech en leet e soort sókkerpötsje zien vaan ’t model Récommer vaan de Sphinx. Vief euro. Gans gaaf waors ’t neet mie. ’t Vertuinde get broen striepe binnenin ’t pötsje meh ’t woort gekoch en steit noe bij us in de kas. ’t Pas bij de res vaan dat servies en zal dus binnekort deens doen.
Iech bewunder de lui die edere zoondag, en welliech nog aander daog, hunnen handel oetstalle en tege d’n aovend weer inpakke, inlaoje en weer oetlaoje es ze thoes zien. Meh handel blijf handel en me verdeent op dees wijs get extra. ’t Zönneke sjeen ouch nog debij en wat wèlt ‘ne mins daan nog mie.
Jan Janssen
