Inhoudsopgave
Este vreuger aon de kant vaan de Minckelersstraot de groete deur ope deegs daan kaom diech ‘ne bezundere reuk tegemoot. Dat waors tejaterloch, ’n bezunder loch. Dat kroop bij diech in ‘t blood en daan gebäörde get mèt diech. De kleidkamers waore klein, haos hinnehokke, meh ’t had get bezunders. De ganse femilie vaan de Mestreechter Operette Vereiniging peersde ziech in die klein ruimte um ziech op te werme veur weer ’n sjoen veurstelling vaan Trijn de Begijn of Vrów Luna of ’t Fien Mamzèlke.
De lui zaote diech haos op diene sjoet en dat had get bezunders. In de kleine orkèsbak zaote e paar muzikante en in de loge zaote, get oongemekelek op ‘ne rechte stool, ouch get fans die via de vereiniging nog e pläötske hadde wete te kriege.
‘s-Middag waors ’n does vaan piepsjoem opgehaold bij van Gend en Loos aon de Statesingel. In die does zaote druugies, iesblökskes vaan min 79 graode boe’ste diech aon kós verbranne. Dat ies waors nudeg um damp op de buun te kriege dee lieg euver de grond bleef haange es dat ies in kokend water sópdes. In Vrów Luna waors dat nudeg um de lui te laote geluive tot drei Mestreechtenere e reiske maakde nao de Maon um dao Vrów Luna en ’t Menneke in de Maon tege te koume. Veer leefde – en speulde – op wolke!
Gans Mestreech kaom loere nao de veurstellinge. De vools es speuler tot de Mestreechter Geis in de zaol hing. Zeker es op ’t ind vaan ’t speul vaan Vrów Luna ’t sjovinistische leed “Mestreechter Geis” woort gezonge en alle veurdeile vaan Mestreech muzikaol woorte opgesomp.
Iech rappeleer miech ouch de kier tot veer es speulers de ganse zaol aon ’t lache kraoge en allein de speulers wiste veurwat gelache woort. Veer hadde get oetgevrete mèt de kleier vaan Mao Willems meh dat kóste allein veer zien. Meh de lui lachde mèt en naoderhand móste veer in de Spiegelzaol oetlègke wat noe eigelek gebäörd waor. Dat is Mestreech!
De Bonbonnière huurt bij de historie vaan Mestreech. Edere brik vaan dat gebouw kin e verhaol vertèlle euver bezunder veurstellinge, ’t Prinsebal, Hieringbietekonzérs en gaank zoe mer weier. ’t Gebouw is ’t weerd um te herrijze en weer ’n sjoen functie te kriege.
Jan Janssen
